Noticias
01/10/2026
Kronika: 15. jardunaldia uda (irailak 30)
Donostiako Hipodromoak asteazken honetan eman dio amaiera bere 110. Denboraldiari, urteko hamabosgarren eta azken jardunaldia jokatuta. Bost lasterketako goizak hiru hilabete baino gehiagoko lehiari amaiera emateko eta joan den ekainaren 11n hasi eta oroimenerako hitzordu ugari utzi dituen denboraldiari agur esateko balio izan zuen.
Jardunaldia Bares del Hipódromo Sariarekin hasi zen, 2.200 metroko handicap zatituaren lehen zatiarekin. Zazpi parte-hartzaile abiatu ziren eta garaipena Sweet Wishentzat izan zen, goizeko lehen ezusteko handia emanez. Víctor Horacio Romeak prestatutako Olympus kuadrako behorra, Daniela Rodríguezek gidatuta, apustuetan babes gutxien zuen parte-hartzailea izan arren nagusitu zen. Sweet Wishek hiru laurdeneko aldea atera zion Shangarri, eta Party Zonek osatu zuen hirukotea. Sir Polo faboritoak laugarren postuarekin konformatu behar izan zuen.
Bigarren lasterketa Joxe Mari Taberna - Hernani Saria izan zen, 1.400 metroko balio-handicapa. Ring of Diamondsek garaipen estua lortu zuen Denisa Sikorováren gidaritzapean, Belén kuadrarentzat eta Carlos Buesa prestatzailearentzat. Jockey txekiarrak indarrak une erabakigarrirako gordetzen jakin zuen, eta Ring of Diamondsek lepo bateko aldeaz menderatu zuen Going Commando, garaipena oso garesti saldu zuena. Gorputz erdira iritsi zen Kokushoku, Óscar Anayaren bi ordezkariek bigarren eta hirugarren postuak eskuratu zituzten probaren hirukotea osatuz.
Goizaren erdialdean Arkupe Taberna - Donostia Saria jokatu zen, 1.300 metroko baldintzapeko proba. Dapango faborito nagusiak aurreikuspenak bete eta eguneko hirugarren garailea bihurtu zen. Estatuan egin zuen lehen agerraldian, Óscar Anayak prestatutako eta Ricardo Sousak gidatutako Isla de Fuerteventura kuadrako zaldiak aurkariek baino maila handiagoa erakutsi zuen, hiru gorputz eta erdiko aldeaz nagusituz. Zalamera bigarren izan zen, eta Revenue, Julia Zambudiorekin, hirugarren postuan helmugaratu zen.
Jardunaldiko laugarren lasterketak, Ondarreta Taberna - Andoain Sariak, hasiera eman zion Václav Janá?ekek Donostiako denboraldiari amaiera emateko lortuko zuen garaipen bikoitzari. Botiki, Martul kuadrako ordezkaria eta Miguel Alonsok prestatua, 2.200 metroko handicap zatituaren bigarren zatian nagusitu zen. Janá?ekek progresioan planteatu zuen lasterketa eta, azkenean, Quien Sabe harrapatzea lortu zuen; azken horrek protagonismoa bere gain hartu eta helmugako zutoinera arte borrokatu zuen. Sudur batek baino ez zituen banandu bi zaldiak, goizeko helmugaratze estuenetako batean. Tony Montana, Denisa Sikorovárekin, hirukotea osatu zuen bi gorputzera.
Eta iritsi zen denboraldiari behin betiko amaiera emateko unea. 1.600 metroko Bar Génesis - Lasarte-Oria Saria goizeko bosgarren eta azken lasterketa izan zen, eta Donostiako Hipodromoaren 110. Denboraldiari ofizialki amaiera emateko ardura ere izan zuen. Maloulo erretiratu ondoren, zortzi parte-hartzailek urteko azken garaile bihurtzea bilatu zuten, eta azkenean Grand Son of Calyx izan zen garaipena eskuratu zuena.
Rubén Marotok prestatutako Palco 7 kuadrako zaldiak aliatu ezin hobea aurkitu zuen Václav Janá?ekengan. Jockey txekiarrak bere garaipen bikoitza osatu zuen horrela, eta Grand Son of Calyx nagusitasunez gailendu zen, Rastrellareri bi gorputz eta erdiko aldea aterata. Rastrellarek berriro ere bere erregulartasuna erakutsi zuen eta Donostian jarraian lortutako hirugarren postu saritua gehitu zuen. Warren Hill hirugarren izan zen, bigarren sailkatuarengandik gorputz erdira. Hiru hilabete eta erdi geroago, Grand Son of Calyxek eta Václav Janá?ekek 2026ko azken garaileak izateko ohorea izan zuten.
110. Denboraldia historiara igaro da jada. Denboraldi luzea eta bizia izan da, oroimenerako unez betea, eta beste behin erakutsi du Donostiako Hipodromoa historia handiko lekua dela, baina baita oraindik idazteko istorio asko dituen tokia ere.
Eskerrik asko guztioi eta datorren denboraldira arte!
