23/07/2026

Aurretikoa: 5. jardunaldia uda (uztailak 25)

Donostiako Hipodromoak datorren larunbatean, uztailaren 25ean, Santiago egunean, 2026ko Udako Denboraldiko bosgarren jardunaldia hartuko du. Lehen lau jardunaldietan maila handiko ikuskizun kirolzalea eskaini ondoren, udako egutegiak hitzordu berri bati egingo dio ongietorria, goizeko ordutegian izango denari. Jardunaldia 10:42an hasiko da.

Jardunaldiari hasiera emango dio San Sebastian Gastronomika Sariak, 2.200 metroko probak, hiru urtetik gorako zaldi eta behorrentzat. Lehen sari honetako garaipena lortzeko zortzi hautagaien artean, One More Night behorra nabarmentzen da. Ramón Costak entrenatutako zaldiak garaipen bat eta bigarren postu bat lortu ditu Donostiako Hipodromoan jokatutako azken bi lasterketetan. Aukera handiekin dator, halaber, Nat Impact, duela gutxi bertan irabazi baitzuen, One More Night bera mendean hartuta. 2026an jokatutako hiru lasterketetatik bitan garaile izan da. Arreta berezia merezi du Pinarelluk ere; urteko laugarren lasterketa izango du bere gustuko pistan, non bigarren postu bat eta bi hirugarren postu lortu dituen.

Ondoren jokatuko da A Caballo Ganador Saria, 2.000 metroko lasterketa, bi garaipen lortu ez dituzten hiru urteko potro eta potrientzat. Bederatzi parte-hartzaileren artean, faborito nagusia Armero da. Guillermo Arizkorretak entrenatutako potroak maila bikaina eman du orain arteko hiru agerraldietan, eta joan den apirilean Donostiako Hipodromoan bere debutean lortutako garaipena errepikatzeko asmoz iritsiko da. Ez dio lan erraza jarriko Marie Janek; Donostian estreinatuko da eta Zarzuelan garaipen bat eta bi bigarren postu lortu berri ditu.

Jardunaldiaren erdian jokatuko da Alusaldu Saria, 1.400 metroko lasterketa, hamar parte-hartzailerekin. Faborito argia Maximum Scepticism izango da. Sasoi bikainean iritsiko da, 2026an Zarzuelan jokatutako hiru lasterketetatik bi irabazi ostean. Donostian egingo du debuta, eta bere entrenatzailearen hitzetan: «Lasterketa bakoitzean hobera egin du eta espero dut bide beretik jarraitzea. 1.400 metroak oso egokiak direla iruditzen zait berarentzat». Kontuan hartu beharrekoa izango da The Wiser ere; urteko bosgarren lasterketa izango du, Zarzuelan garaipen bat eta bigarren postu bat eskuratu ondoren.

Jardunaldiko azken aurreko proban jokatuko da Construcciones Moyua Saria, 2.200 metroko lasterketa eta hamar hautagairekin. Faboritoen artean Tony Montana nabarmentzen da. Ana Imazek entrenatutako zaldiak azken bi urteetan Donostiako Hipodromoan bakarrik lehiatu da, eta 2026ko emaitzek babesten dute: garaipen bat eta bi sailkapen on bere hiru agerraldietan. Kontuan hartu beharrekoa izango da Save Your Breath ere. Bere entrenatzaileak hobekuntza espero du aste batzuk lehenago lortutako laugarren postuaren ondoren: «Oso ondo aritu zen handicapeko lehen zatian, baina bigarren zatian hobeto moldatzen da. Azken lasterketa errepikatzen badu, aukera handiak izango ditu».

Bosgarren udako jardunaldia ixteko jokatuko da El Diario Vasco Saria, 1.400 metroko lasterketa eta hamalau hautagairekin. Parte-hartzaileen artean Vamos Niño nabarmentzen da. Donostiako Hipodromoan bosgarren aldiz lehiatuko da, eta aurreko lau parte-hartzeetan bi garaipen eta bigarren postu bat lortu ditu. Zarzuelan azken hiru agerraldietan ihes egin dion garaipena eskuratzen saiatuko da. Oso kontuan hartu beharrekoa izango da Smoky Mountain ere; sasoi betean dator eta jarraian hirugarren garaipena bilatuko du, apirilean Donostian eta ondoren Zarzuelan lortutako bi garaipenen ostean.

Uztaileko azken jardunaldia Donostiako Hipodromora iritsiko da abuztuaren atarian. Hilabete horretan jokatuko dira denboraldiko lasterketa gehienak, eta udako egutegiko jardunaldirik garrantzitsuen eta ikusgarrienak bilduko dira. Uda bete-betean, zaletuek denboraldiko hitzordurik esperoenak gozatzeko aukera izango dute.

23/07/2026