03/06/2026

Donostiako Hipodromoak hartuko du Dantz Point Gipuzkoa 2026 ekimenaren amaiera datorren urriaren 3an

Musika elektronikoak berriro ere Gipuzkoako txoko berezienetako batzuk izango ditu agertoki 2026an, Dantz Point Gipuzkoa LABORAL Kutxaren edizio berriari esker. Uztaila eta urria bitartean lurraldeko bost gune esanguratsu zeharkatuko dituen ekimenak Donostiako Hipodromoan izango du amaiera, urriaren 3an. Horrela, lehen aldiz, hipodromoa kultur proiektu honetako agertoki nagusietako bat izango da.

Dantzek eta LABORAL Kutxak sustatutako ekimen honek, Gipuzkoako hainbat erakunderen laguntzarekin, musika elektronikoa eta abangoardiakoa balio historiko, kultural eta paisajistiko handiko espazioetara hurbiltzea du helburu. Aldi berean, kultura garaikidearen eta lurraldearen arteko harreman berriak sortu nahi ditu.

Udaran zehar Gipuzkoako beste lau udalerri bisitatu ondoren, zirkuituak Donostiako Hipodromoan izango du azken geldialdia. Gainera, 2026an hipodromoak bere 110. lasterketa-denboraldia ospatzen du. Aukera paregabea izango da Gipuzkoako kirol-instalazio adierazgarrienetako baten beste aurpegi bat erakusteko, publiko berriei eta kultur adierazpen berriei ateak zabalduz.

Azken urteotan, Dantz Point erreferente bihurtu da aire zabaleko kultur programazioaren esparruan, musika elektronikoa, ondarea eta jasangarritasuna uztartuz aparteko espazioetan. Formatu honek interes historiko eta paisajistiko handiko lekuak balioan jartzea ahalbidetu du, publiko guztientzat irisgarriak diren kultura-esperientzia berritzaileen bidez.

Urriaren 3ko hitzorduak, beraz, amaiera emango dio Dantz Point Gipuzkoa LABORAL Kutxa 2026 edizioari. Musika, kultura eta ondarea elkartuko dira ingurune paregabe batean, eta beste behin ere agerian geratuko da Gipuzkoako espazio esanguratsuenetako baten moldakortasuna eta erakargarritasuna.

DANTZ POINT GIPUZKOA 2026

Zumaia - Itzurun Hondartza (2026/07/11)

Donostia - Aste Nagusia (2026/08/14)

Arrasate - Monterron Parkea (2026/09/19)

Errenteria - Mendilorealdea (2026/09/26)

Donostiako Hipodromoa (2026/10/03)

03/06/2026